تجربہ کار کھلاڑی سریش رائنا نے تمام طرز کی کرکٹ سے ریٹائرمنٹ لے لی

نئی دہلی،  ہندوستان کے سابق بلے باز سریش رائنا نے منگل کے روز تمام طرز کی کرکٹ سے ریٹائرمنٹ کا اعلان کرتے ہوئے انہیں بیرون ملک ٹی ٹوئنٹی لیگ کھیلنے کا اہل بنا دیا۔ مہندر سنگھ دھونی کی جانب سے ریٹائرمنٹ کے اعلان کے بعد 35 سالہ کھلاڑی نے 15 اگست 2020 کو بین الاقوامی کرکٹ کو الوداع کہہ دیا تھا۔ رائنا نے 2021 میں انڈین پریمیئر لیگ (آئی پی ایل) میں کھیلنا جاری رکھا لیکن 2022 کے سیزن سے قبل چنئی سپر کنگز نے انہیں نہیں لیا تھا۔ کرکٹ بورڈ آف انڈیا، اتر پردیش کرکٹ ایسوسی ایشن اور چنئی سپر کنگز کا شکریہ ادا کرتے ہوئے رائنا نے ٹویٹ کیا، ’’اپنے ملک اور ریاست اتر پردیش کی نمائندگی کرنا میرے لیے اعزاز کی بات ہے۔ میں تمام طرز کی کرکٹ سے ریٹائرمنٹ کا اعلان کرتا ہوں۔ ہندوستان میں یا مقامی طور پر سرگرم کھلاڑی غیر ملکی لیگوں میں حصہ نہیں لے سکتے اور رائنا کے لیے دنیا بھر کی ٹی ٹوئنٹی لیگز میں کھیلنے کے لیے ریٹائر ہونا ضروری تھا۔ وہ اگلے سال جنوبی افریقہ کی نئی ٹی ٹوئنٹی لیگ میں کھیلتے ہوئے دیکھے جا سکتے ہیں۔ اس لیگ کی تمام چھ ٹیمیں آئی پی ایل کے مالکان کی ملکیت ہیں۔ رائنا نے چنئی کے لیے اپنا آخری مسابقتی میچ اکتوبر 2021 میں ابوظہبی میں راجستھان رائلز کے خلاف کھیلا۔ رائنا نے ہندوستان کے لیے 18 ٹیسٹ، 226 ایک روزہ اور 78 ٹی 20 انٹرنیشنل کھیلے۔ وہ 2011 میں ورلڈ کپ جیتنے والی ٹیم کے رکن تھے۔